Media - 2016120901 - Thanks to Apple Daily HK for hunting Yoswit!


換個電掣變智能家居 遙控變追蹤器咁有趣


有無想過只需一個特製開關電掣、一部智能手機,毋須額外裝修就可打造成智能家居?嶺勤科技有限公司創辦人之一吳啟鍫(Colin)因一次家居裝修,發現市面上智能家居電掣難以安裝,因而萌生研發DIY智能開關電掣(Reinvented Smart Wall Switch),用家毋須大規模裝修就可為自己打造一個五星級的家。


Colin接受《蘋果》專訪時表示,3年前家中裝修,從市面購買智能產品冀打造智能家居,事後才發現「裝唔到個(智能開關)電掣,師傅話一係你重新拉過啲線」,當下感覺「點解市面上啲人做隻產品出嚟,同屋企嘅根本唔夾,好似畀人呃咗」。經深入了解才發現智能開關電掣與傳統電掣最大分別是需額外「拉多條線」,以接駁電力供電予電掣運作。


他續說,「要拉多條線,裝修工程好大,屋主可能要重新拉線或大裝修先得」,惟他所研發智能電掣則解決這方面問題,關鍵是「點樣扮一條假嘅回流電,去draw(引出)一啲好細電流供電畀個掣」,又指「唔洗額外裝修,一般嘅電工都安裝到」。他坦言最大難度是在於如何改善智能電掣支援不同類型的燈也可穩定操作,因此研發過程花了數年時間,「(當時)買咗200幾款燈泡做testing(測試),每個燈都test成兩個幾月」;若然技術處理不好,「盞燈會眨下眨下」。現時研發出8款不同類型燈掣,另有窗簾開關、門匙和抽氣扇等智能電掣。


他指用家在家安裝一個DIY智能開關電掣,並下載一個手機應用程式,就可利用手機藍芽控制屋內燈泡、冷氣機和窗簾等開關。有試用用家以往每日需下班後就立即回家,因為其寵物狗怕黑,要趁天黑前回家開燈,「(用家)自從用咗呢個產品,就唔洗再趕返屋企開燈」;亦有用家家中所用的熱水爐需時預熱,但24小時開着熱水爐就變成浪費,其產品可預先調較時間開關,因此可以節省資源之餘,亦相對環保。


Colin又針對電視、音響等紅外線傳輸的電器,研發出攜帶式智能萬能控制器(World's1st Portable Smart Remote& Gadget),「(控制器)已經收集好多唔同牌子嘅數據,只要係有紅外線都可以用」,所以十分適合旅行使用,方便經常入住酒店或Airbnb的用家。他又指智能控制器上有5個按鈕,可順應戶喜好預設不同電器的開關,只需兩粒3A電芯就足夠兩年使用,或者可插USB充電。


Colin指產品斥資約200萬元研發,本周二已開始眾籌,計劃明年3月出貨。暫定DIY智能開關定價為美金49至69元不等(約港幣380.2元至535.4元);智能控制器定價為美金39至49元不等(約港幣302.6元至380.2元),未來會研發智能電掣加入感光等功能。


記者張文鈴 

SOURCE: Apple Daily HK

Specialized in Smart Wall Switches

Our Brands